പിതാക്കൾക്ക് ഒരു ദിവസം

ജൂണ്‍ മാസത്തിലെ മൂന്നാം ഞായറാഴ്ചയാണ് ഇന്‍ഡ്യയില്‍ പിതാക്കളുടെ ദിനമായി കൊണ്ടാടുന്നത്. കുടുംബവ്യവസ്ഥയില്‍ പിതാക്കള്‍ക്കുള്ള സ്ഥാനത്തെക്കുറിച്ചും പിതാവിൻ്റെ കരുതലിനെക്കുറിച്ചുമൊക്കെ എല്ലാവരും ചര്‍ച്ച ചെയ്യുന്ന ദിവസം. അമ്മയുടെ അസാന്നിദ്ധ്യത്തിലും മക്കളെ വളര്‍ത്തി വലുതാക്കിയ പിതാക്കളുണ്ട്. അമ്മയെക്കാളേറെ മക്കള്‍ക്കു പ്രിയങ്കരന്‍മാരായിത്തീര്‍ന്ന പിതാക്കളുമുണ്ട്. പത്തുമാസം മക്കളെ ചുമന്നു പ്രസവിക്കുകയും മുലയൂട്ടി വളര്‍ത്തുകയും ചെയ്യുന്ന അമ്മയേയും അതേയളവില്‍ സ്‌നേഹം ചൊരിയുന്ന അച്ഛനെയും താരതമ്യം ചെയ്യാനാകില്ല. എങ്കിലും അമ്മമാരുടെയും അച്ഛന്‍മാരുടെയും ലോകം എവിടേയോ വ്യത്യസ്തമാകുന്നുണ്ട്. പിതൃത്വവും മാതൃത്വവും ഒരുപോലെ ചര്‍ച്ച ചെയ്യപ്പെടുന്ന ഈ ദിവസത്തില്‍ എല്ലാ പിതാക്കള്‍ക്കും നന്മകള്‍ നേരുന്നു.